தீபாவளியைக் கொண்டாட நுவரேலியா மாவட்டத்திற்கு வந்தவர்களில் இதுவரை 25 பேருக்கு கொரோனா!! மாவட்டத்தில் மொத்த எண்ணிக்கை 89 ஆக உயர்ந்தது!

நுவரெலியா மாவட்டத்தில் நேற்று வரை 89 கொரோனா வைரஸ் தொற்றாளர்கள் அடையாளம் காணப்பட்டுள்ளனர். அவர்களில் 25 பேர் தீபாவளி பண்டிகையை முன்னிட்டு கொழும்பிலிருந்து வந்தவர்கள் என நுவரெலியா மாவட்ட சுகாதார பணிப்பாளர் வைத்தியர் இமேஷ் பிரதாபசிங்க இன்று தெரிவித்துள்ளார்.இது தொடர்பில் அவர் மேலும் தெரிவிக்கும் போது;

நுவரெலியா மாவட்டத்தில் இதுவரையில் 2 ஆயிரத்து 442 பி.சி.ஆர் பரிசோதனைகள் மேற்கொள்ளப்பட்டுள்ளன. இதன் மூலம் 89 தொற்றாளர்கள் நேற்று வரை அடையாளம் காணப்பட்டுள்ளனர்.இதில் 28 பேர் கொழும்பு மாநகர எல்லைக்குட்பட்ட பகுதியிலிருந்து வந்தவர்களாவர் என்பது குறிப்பிடத்தக்கது.கொழும்பு உட்பட கொரோனா வைரஸ் வேகமாகப் பரவும் பகுதிகளிலிருந்து வெளியிடங்களுக்கு வரவேண்டாம் எனத் தீபாவளி பண்டிகைக்கு முன்னர் கோரிக்கை விடுக்கப்பட்டது. தடுப்பதற்கான நடவடிக்கையும் முன்னெடுக்கப்பட்டது.இதன்படி வருகையைக் கட்டுப்படுத்தக்கூடியதாக இருந்தது. எனினும், அதற்கு முன்பாக வந்தவர்களிடம் தற்போது பரிசோதனை நடத்தப்பட்டு வருகின்றன. அதேவேளை, கொழும்பிலிருந்து தற்போதும் தோட்டப்பகுதிகளுக்கு மக்கள் வருகின்றனர்.அவ்வாறு வருபவர்களிடம் கலுகல்ல பகுதியில் உள்ள சோதனைச் சாவடியில் வைத்தே பி.சி.ஆர் பரிசோதனைக்கான மாதிரிகளைப் பெறும் நடவடிக்கை சனிக்கிழமை முதல் ஆரம்பமாகியுள்ளது. சனிக்கிழமை 50 பேரிடம் மாதிரிகள் பெறப்பட்டன.அதில், மூவருக்குத் தொற்று உறுதியானது.இது நூற்றுக்கு 3 சதவீதமாகும்.
அதேபோல கண்டி, நுவரெலியா வீதியில் எல்பொட பகுதியில் உள்ள சோதனைச்சாவடியிலும் இன்று முதல் இவ்வாறு பி.சி.ஆர் பரிசோதனை நடத்தப்படும். இதற்காக விசேட குழுவொன்று ஈடுபடுத்தப்பட்டுள்ளது.
கொரோனா வைரஸ் பரவலைக் கட்டுப்படுத்துவதற்கு மக்கள் ஒத்துழைப்பு வழங்கவேண்டும்.தோட்டப் பகுதிகளுக்கு வைரஸ் பரவுவதைக் கட்டுப்படுத்தவே நாம் இவ்வாறு செயற்படுகின்றோம். மக்களும் சுகாதார நடைமுறைகளை முழுமையாகப் பின்பற்ற வேண்டும் என்று கூறியுள்ளார்.