முற்றுகின்றது முறுகல்…மாகாணசபைத் தேர்தலில் மொட்டுக்கு பதிலடி கொடுத்து தனிவழி செல்லத் தயாராகும் சுதந்திரக் கட்சி..!!

மாகாண சபைத் தேர்தலில் தனித்துக் களமிறங்குவது தொடர்பில் முன்னாள் ஜனாதிபதி மைத்திரிபால சிறிசேன தலைமையிலான ஶ்ரீலங்கா சுதந்திரக் கட்சி ஆராய்ந்து வருவதாக அக்கட்சி வட்டாரங்களில் இருந்து அறியமுடிகின்றது.இலங்கையில் வடக்கு, கிழக்கு உட்பட 9 மாகாண சபைகளுக்கும் ஒரே நாளில் தேர்தலை நடத்துவதற்குத் திட்டமிட்டுள்ள அரசு, அதற்கான பூர்வாங்க நடவடிக்கைகளை முன்னெடுத்துள்ளது. இதன்படி இடைக்கால கணக்கறிக்கையில் மாகாண சபைகள் மற்றும் உள்ளூராட்சி அமைச்சுக்கு அதிக நிதி ஒதுக்கப்பட்டுள்ளது.
எனவே,மாகாண சபைத் தேர்தலை எதிர்கொள்வதற்காக பிரதான அரசியல் கட்சிகள் தயாராகி வருகின்றன.

இந்தநிலையிலேயே தேர்தல் தொடர்பில் ஶ்ரீலங்கா சுதந்திரக் கட்சியும் அவதானம் செலுத்தியுள்ளது. அண்மையில் நடைபெற்ற சு.கவின் மத்திய செயற்குழுக் கூட்டத்திலும் இது தொடர்பில் ஆராயப்பட்டுள்ளது.நடைபெற்று முடிந்த பொதுத்தேர்தலில் நுவரெலியா, களுத்துறை மற்றும் யாழ்ப்பாணம் ஆகிய மாவட்டங்களில் தனித்தும் ஏனைய மாவட்டங்களில் ஸ்ரீலங்கா பொதுஜன முன்னணியுடன் இணைந்தும் சுதந்திரக் கட்சி போட்டியிட்டது. எனினும், பொதுஜன முன்னணியினரால் சுதந்திரக் கட்சி உறுப்பினர்களுக்கு கடும் நெருக்கடிகள் கொடுக்கப்பட்டன.

பிரசாரங்களின்போது சரமாரியாகச் சொற்களைகள் தொடுக்கப்பட்டன. ஆசனப் பங்கீட்டிலும் அநீதி இழைக்கப்பட்டது என்ற கருத்து நிலவுகின்றது.எனவே தான் மாகாண சபைத் தேர்தலில் தனி வழி செல்வது பற்றி ஆராயப்பட்டு வருகின்றது.இதன்படி, சில மாகாணங்களில் தனித்தும் சில மாகாணங்களில் கூட்டுப் பயணத்தையும் சு.க. மேற்கொள்ளலாம் என நம்பப்படுகின்றது.சுதந்திரக் கட்சியின் வருடாந்த மாநாடு செப்டெம்பர் 2ஆம் திகதி கொழும்பில் நடைபெறவுள்ளது.இதன்போது மாகாண சபைத் தேர்தல் தொடர்பிலும் தீர்மானமொன்று நிறைவேற்றப்படவுள்ளது எனவும் அறியமுடிகின்றது.