கூட்டமைப்பு சாவி கொடுத்து ஆட்டுவிக்கும் பொம்மையாகவே ஐ.தே.க மாறியுள்ளது.. சீற்றம் கொள்ளும் மஹிந்த ராஜபக்ஷ….

தற்போதைய அரசாங்கத்தின் செயற்பாடுகள் அனைத்தும் தமிழ்த் தேசிய கூட்டமைப்பிடமே உள்ளது என தனது பிரதமர் பதவியை இராஜினாமா செய்த பின்னர் அறிக்கை வெளியிட்டுள்ளார் மஹிந்த ராஜபக்ஷஅவர் கூறியிருப்பதாவது….

பெப்ரவரி மாதம் 10ஆம் திகதி நடைபெற்ற உள்ளூராட்சி சபைத் தேர்தலின் பின்னர் மக்களுக்குப் பொதுத் தேர்தல் ஒன்றைப் பெற்றுக் கொடுப்பதே எமது இலக்காக இருந்தது. நாடாளுமன்றில் வெறுமனே 103 ஆசனங்களை கொண்டுள்ள ஐக்கிய தேசிய கட்சியை தமிழ்த் தேசிய கூட்டமைப்பு பணயக் கைதியாக வைத்து இயக்கிக் கொண்டுள்ளது.

தமிழ்த் தேசிய கூட்டமைப்பின் கோரிக்கைகளுக்கு ஐக்கிய தேசிய கட்சி மறுப்பு தெரிவிக்குமாயின் நாடாளுமன்றில் பெரும்பான்மையை இழக்க நேரிடும். ஐக்கிய தேசிய கட்சி நாட்டின் பொருளாதாரத்தை படு பாதாளத்திற்கு கொண்டு சென்றுள்ளது. கடந்த மூன்றரை வருடங்களில் ஐக்கிய தேசிய கட்சி 20.7 பில்லியன் அமெரிக்க டொலர்களை கடனாக பெற்றுள்ளது. இதன் காரணமாக டொலருக்கு நிகரான இலங்கை நாணயத்தின் பெறுமதி மேலும் வீழ்ச்சி அடையவுள்ளது.

நாங்கள் நாட்டின் அபிவிருத்திக்காகவே கடன் வாங்கினோம். அது அனைவருக்கும் தெரிந்த விடயமே ஆனால் அவர்கள் கடன் வாங்கியது தேவயைற்ற செயற்பாடுகளுக்காக. இந் நிலையில் மீண்டும் ஆட்சியை அவர்களிடம் ஒப்படைக்கின்ற பட்சத்தில் மிகுதியிருக்கும் காலத்தில் எவ்வளவு தொகையை கடனாக பெறுவார்கள் எனத் தெரியவில்லை எனத் தெரிவித்தார்.

மக்கள் எதிர்பார்த்துள்ள மாற்றத்தை ஏற்படுத்துவதற்குத் தற்போது தாமதம் ஏற்பட்டுள்ளது. எனினும், அந்த மாற்றத்தை கட்டாயம் ஏற்படுத்துவோம். தேர்தல் இன்றி முன்னோக்கிச் செல்லும் வேலைத்திட்டமே தற்போது முன்னெடுக்கப்படுகின்றது. ஒரு வருடமும் மூன்று மாதங்களாலும் தாமதமடைந்துள்ள மாகாண சபைத் தேர்தலை நடத்துவதே எமது பிரதான இலக்கு.

மாகாண சபைத் தேர்தலை ஐக்கிய தேசிய கட்சியின் தலைமையிலான அரசாங்கம் பிற் போட்டதைப் போன்று நாடாளுமன்றத் தேர்தலையும் இந்த அரசாங்கம் பிற்போடும். மாகாண சபைத் தேர்தலை பிற்போட்டிருப்பது போன்று, எல்லை நிர்ணய பிரச்சினையை ஏற்படுத்தி 2020ஆம் ஆண்டு பொதுத் தேர்தலையும் பிற்போடுவதற்கே அவர்கள் திட்டமிட்டிருக்கின்றார்கள்.

அப்போதைய ஜனாதிபதி சந்திரிக்கா பண்டாரா நாயக்க குமாரதுங்கவிற்கு தெரியாமலேயே விடுதலைப்புலிகளுடனான சமாதான உடன் படிக்கையில் ரணில் கைச்சாத்திட்டார். அதேபோல், ஜனாதிபதிக்கு தெரியாமலேயே பல விடயங்களை ஐக்கிய தேசிய முன்னணி அரசாங்கம் எதிர்காலத்தில் செய்யக்கூடும் என மஹிந்த ராஜபக்ஷ தனது நீண்ட அறிக்கையில் குறிப்பிட்டுள்ளார்.

உங்கள் கருத்துக்கள் மற்றும் நண்பர்களுடன் பகிருங்கள்

கருத்துக்கள்